Groot FM 90.5 Inspirasie vir vandag! Welgedaan aan almal betrokke by hierdie mooi verhaal... ‘n Storie van HOOP!!
Toe die Woeries vanoggend 10 uur op die skool se aantreeblad bymekaar kom, het niemand geweet wat vir geliefde Juffrou Maretha Kruger (44) voorlê nie... Inteendeel, min mense het tot vandag geweet dat sy na ‘n lang dag op haar voete voor in die Duitse klas of op die sportveld waar sy Netbal, Sagtebal en Hokkie afrig, in die aand omtrent net kan lê met warmsakkies vir die pyn of dat sy op 5-jarige ouderdom al haar eerste kunsbeen gekry het en tot op hede dit elke 2 jaar moes vervang as gevolg van die slytasie op haar enkel. Jy sal dit nie sommer van haar weet nie, want in haar 22 jaar as onderwyseres het sy nog nooit toegelaat dat haar siekte haar op enige manier onderkry of terughou nie.
Die “kampstige” vergaderging waarvoor iemand haar laat kom het, het ons kans gegee om gou die leerders te vertel hoekom ons daar is en toe sy op die lang stoep voor die klaskamers aangestap kom, het die Woeries in ‘n baie emosionele oomblik soos een man vir haar opgestaan – amper asof hulle met ‘n gebaar erkenning wou gee aan hierdie juffrou wat haar lewe lank ten spyte van en te midde van haar moeilike omstandighede nog elke oggend opgestaan het om ‘n verskil te gaan maak.
Maretha is met Ollier disease gebore - ‘n siekte van die skelet wat gekenmerk word aan groeisels van kraakbeen binne in die bene. Dit veroorsaak geweldige pyn en ook die verswakking en vervorming van die ledemate. Die groeisels kan potensieel omsit in ‘n seldsame soort beenkanker wat nie deur bestraling of chemoterapie genees kan word nie.
Haar ouers het die eerste paar jaar van haar lewe in hospitale deurgebring opsoek na oplossings. Toe die dokters dit uiteindelik ‘n naam kon gee, het hulle vir haar ouers gesê sy sal net tot in haar twintigs leef. Sy het besluit om hulle verkeerd te bewys en met ‘n verkorte regterbeen én kunsbeen alles wat rof is gedoen - van boomklim tot fietsry!
In graad 8 het sy beenkanker in haar regterarm gekry wat die ortopeet suksesvol kon verwyder. Hulle het geglo sy sal net minimale funksie van haar arm hê, maar sy het begin swem en vandag kan haar swak regterarm selfs makliker na agter buig as haar linkerarm.
Maretha het haar ouers vir meer as 15 jaar lank versorg tot haar pa in 2015 oorlede is en haar ma aan die begin van hierdie jaar. Maretha se ma kon later glad nie meer sonder ‘n raam of rolstoel beweeg nie, sy moes haar oor naweke alleen versorg, wat natuurlik ‘n geweldige uitwerking op haar eie skelet gehad het. Boonop is haar ouers ingedoen met ‘n skema waarin hulle geld belê het en Maretha moes ‘n lening aangaan om hulle rekeninge te help betaal.
Die pyn in Maretha se regterbeen het die laaste 3 jaar vererger. Toe Dokters einde laas jaar opereer, het hulle kanker gekry en moes haar regterbeen dié slag bo haar knie geamputeer word. Sy betaal nog af aan die mediese uitgawes van die verskillende operasies, die lening om haar ouers te kon help én boonop het haar kar ook gebreek so daar was nog net nie fondse vir die kunsbeen wat sy nou nodig het nie... Tog, ten spyte van al hierdie uitdagings hou sy voluit skool, kom sy oor die weg met haar krukke en ‘n leen been van die ortopeet en ‘n droom in haar hart om weer aktief op die sportveld te wees om die kinders voor haar in die klas, op nog ‘n manier te bereik.
Maretha se inspirerende storie het soveel van ons vriende aan die hart gegryp dat sommer ‘n hele span mense vandag ingespring het om op een of ander manier haar las te help verlig! Sy het R24 000 gekort vir haar kunsbeen en Cosmo Industrial het met hulle fondse van die 2018 Cosmo Run ‘n R14 000 bydrae gemaak, want sy is so ‘n voorbeeld van die Cosmo Run se slagspreuk: “Get Up. Make a Choice. Set the tone." Ons het King Price se hart vir die onderwys en opvoeding al soveer keer gesien en vandag het hulle R10 000 geskenk om die balans van die kunsbeen vir hierdie passievolle juffrou te betaal. Hulle het ook 'n verdere R4 000 gegee vir die fisioterapie en rehabilitasie wat Maretha sal nodig hê na sy haar nuwe been gekry het. SPAR Northrand het ‘n R1000 geskenkkaart gegee en Vision Properties R5000 om verligting te bring met ten minste een maand se huuruitgawe. En toe daar lankal nie meer ‘n droë oog oor is tussen die duisend mense wat om Maretha staan nie, het We Buy Cars gekom met ‘n R23 000 skenking vir die herstel van haar kar om haar weer daardie stukkie onhanfhanklikheid te kan teruggee – ‘n totale #HOOPstoot van R57 000 waarvoor ons almal ontsettend dankbaar is!
Toe ons groet, kom die Woeries nog een vir een vir hulle Juffrou ‘n druk gee en mens besef hierdie hulp van ons borge het nie net vandag ‘n reuse impak op Maretha se lewe gemaak nie, maar ‘n blywende indruk op ‘n generasie jongmense… Kinders wat na vandag met elke tree wat Maretha op die skoolgronde gee, vir altyd herinner sal word aan wat naasteliefde en omgee vir mekaar – selfs van vreemdes – werklik beteken en hoe die keuse in lewende lywe lyk wanneer iemand elke keer wéér opstaan maak nie saak hoeveel verskillende uitdagings haar probeer plattrek of pootjie nie… ... See more
